Valorizziamo l’esistente a Mombello di Torino

Cost a l’é ël nòm dàit a la festa, a la sconda edission, che la Comun-a ‘d Mombel a presenta dumìnica 28 magg 2017. La Bienal an sle bon-e pràtiche për lë svilup ch’a dura dël teritòri.

Tante realtà locaj, e nen mach, a s’ancontreran an cost cit pais, piassà a metà stra tra Cher e Castelneuv, për dimostré che ant na società anté che a smija ch’a-i sio mach rus, crisi e tension a l’é possìbil propon-e quaicòs ëd divers. Un messagi ch’a së sposa perfetament con la mission dël sit UNESCO Riserva della Biosfera CollinaPo (ant ël programa Man an Biosphere MaB di UNESCO), dël quale la Comun-a a fà part, ansema a j’àutri 85 teritòri comunaj dl’area oriental dla sità metropolitan-a ëd Turin, dal mars dël 2016: un programa ch’a premia e a promeuv pròpi coj teritòri anté che le culture dla sostnibilità a ven-o butà an pratica, con l’aument dla conossenza dle pràtiche virtuose an sintonìa con j’arzorse naturaj e la biodiversità.

An mes a tante proteste, varda-sì na ProFesta për dì sì a në stil ëd vita fondà an sla solidarietà, an sël rispet, an sla cura dla përson-a, dj’àutri e dl’ambient, an sël gust dle ròbe sempie e che mersì a cost ëspìrit positiv a l’ha ël patrossini dël sit UNESCO CollinaPo e dël Parch regional dël Pò e colin-a turinèisa.

Arlongh le contrà, le piasse e j’àngoj anciarmant ëd Mombel a-i saran artigian, artista, associassion, ent d’arserca e università, che con ij sò stand a presenteran soa professionalità, sò estro, ël piasì dël bel e dlë sté ansema.

As parlerà donca ëd risparmi energètich, d’autoprodussion, ëd mangé san, ëd tëssiura, ëd tradission e inovassion, agri- coltura, solidarietà, sté bin e neuva economia ëd paisagi e biodiversità; a-i saran laboratori, gieugh, leture a vos àuta, auto d’epoca, auto e bici elétriche për promeuve na mobilità sostnibila.

La matin i organiseroma un flash-mob për realisé ël sìmbol dël Ters Paradis ëd Michelangelo Pistoletto, n’assion coletiva che a conterà ël passà, l’avnì e ‘l present ispirà a la Mobilità Sostnibila.
Ël sìmbol dël Ters Paradis a l’é la riconfigurassion dël segn matemàtich dl’anfinì e a l’é fàit da tre cercc consecutiv. Ij doi cercc opòst a esprimo natura e artifissi, l’anel central a l’é la congiunsion dij doi e a rapresenta la fàuda dl’arnassita e ëd n’armonìa che l’òm a peul artrové mach atravers l’arserca d’un rapòrt equilibrà con l’ambient. Donca ël prim cercc a sarà rapresentà con automòbij d’época, lë scond con automòbij d’ancheuj e an mes ël ters cercc a sarà rapresentà con biciclëtte, biciclëtte elétriche e auto elétriche.

Ant ël dòp-mesdì a sarà possìbil partissipé a n’agorà an sël tema “Ël paisagi: capital natural e bin comun, tra economìa e blëssa”, con dj’òspit d’ecession e anté che tuti a podran interven-e. Ël moment fondamental anté che ël messagi UNESCO MaB a sarà ël protagonista, portand esempi e valor valid për tut ël teritòri d’86 Comun-e dl’area oriental dla Sità metropolitan-a turinèisa e ‘dcò për ël teritòri dla colin-a anté ch’a-i é Mombel. La colin-a ëd Turin: n’arsorsa strasordinaria e fin-a a ancheuj nen valorisà.

Valorizziamo l’Esistente a l’é nen na fera o n’esposission, ma na manera për conòsse e apressié tante realtà davsin-e a noi e dimostré che: cit a l’é possìbil, cit a l’é bel, cit a l’é festa, cit a l’é convivial, cit a l’é preferibil… ant un quàder ëd propòsta teritorial e identitaria anciarmanta. A la finitiva tuti a son protagonista, gnun a varda a Mombel ai 28 ëd magg da 9 e mesa a 6 ore dla sèira ansema për #Valorizziamolesistente, na festa esperiensial, realisà sensa contribuù pùblich o privà, con la determinassion e la bon-a volontà ëd chi a chërd ant ij valor che a la identifico.

Organissasion: Associazione CioCheVale, Associazione Animamondo, Comitato S.U.S.A. Sentiero Umano di Solidarietà Artistico Ambientale, Forum Rebirth – La Mela Reintegrata, Ambasciata Terzo Paradiso Colline torinesi
Sostnidor: SarastusForum, Associazione Il Tuo Parco, Associazione MuovitiChieri, Associazione Asset, Premio InediTO – Colline di Torino, Associazione Senza Fili Senza Confini

Media Partner: Piemonte Che Cambia, Picchioverde, Vivere Sostenibile Basso Piemonte

Për anformassion: Alberto Guggino cell. 3357267159 e-mail associazione.ciochevale@gmail.comAssociazione Culturale di Promozione Sociale CioChevale, via Broglia 12 Mombello di Torino www.ciochevale.it

Patrossini: Comune di Mombello di Torino, Riserva UNESCO MaB CollinaPo, Città di Chieri, Consorzio dei Servizi Socio Assistenziali del Chierese, UNESCO Chair in Sustainable Development and Territory Management University of Turin, Associazione Nazionale Comuni Virtuosi , Comune di Baldissero di Torino, Comune di Maren.

IL PROGRAMMA, COME ARRIVARE, TUTTE LE INFO DI DETTAGLIO